Posts filed under 'O`zbek'
“Серқуёш Ўзбекистоним” коалициясининг қамоқдаги раҳбари Санжар Умаровнинг хотини Индира Умарова эрига белгиланган ҳукмни адолатсиз ҳисоблаб, Ўзбекистон раҳбариятига ва бир неча идораларига очиқ хат йўллади.
С.Умаров даромадни яшириш ва солиш тўлашдан бўйин товлаш каби иқтисодий жиноятларда айбланиб, март ойида 10,8 йилга қамалганди. Аппеляция судида эса унга белгиланган жазо муддати 7,8 йилга қисқартирилди.
Шундай бўлса-да, Индира Умарова эрига нисбатан адолатсизлик қилинганини таъкидламоқда. У Ўзбекистон президенти, Вазирлар Маҳкамаси, Миллий хавфсизлик хизмати, Бош прокуратураси, Адлия вазирлиги ва Олий судига жўнатган очиқ хатида ҳукумат олдига бир неча талаблар қўйган. И.Умарова, биринчи навбатда, эрининг мустақил тиббий текширувдан ўтказилиши ва унга малакали тиббий ёрдам кўрсатилишини талаб қилган.
“Биз ҳозир унга кўрсатилаётган тиббий ёрдамдан фойда чиқишига ишонмаймиз, – дейди И.Умарова “Озодлик” радиосига берган интервьюсида. – Яқинда ўтказилган иккинчи инстанция судида турмуш ўртоғимнинг аҳволи анча оғирлашгач, тез тиббий ёрдам чақирилиб, уколь қилиниб, оёққа турғизилган ва сўроққа тутишда давом этилган”.
И.Умарованинг сўзларига кўра, адвокат ҳамон С.Умаров билан учрашишга рухсат ола олмаяпти. Улар фақат аппеляция судидагина кўришган.
“Менга айтишларича, хўжайиним таниб бўлмас аҳволда. Ранглари оқарган, кўзлари ёшга тўлган. Ҳаттоки ўз қариндошлари билан ҳам нормал гаплаша олмаган. Холам врач. Ўшанда бир амаллаб панжара ичига турган эримнинг томир уришини текширган ва даҳшатга тушган. Ҳатто дори ичиш учун сув ҳам беришмаган”, – дейди И.Умарова.
И.Умарова эрига қўйилган айблар юзасидан тақдим этилган ҳужжатларни кўрсатишни талаб қиляпти.
“Коалиция бош ҳисобчиси Ольга Карпенкони касал, деб баҳона қилишиб, судга қўйишмаганди. Ниҳоят у навбатдаги инстанция судида қатнашиб, тафтиш комиссиянинг хулосаларига қўшилмаслигини билдирди. Бундан ташқари, Фарғона нефтни қайта ишлаш заводи билан қилинган қиёслаш актининг йўқолиб қолганига эътибор қаратди ва суд йўқолган ҳужжатларни топиб берса, ўзининг ҳақлигини исботлашини айтди”, – деди И.Умарова.
И.Умарова Ўзбекистон расмийларига ёзган очиқ хатига жавоб келишига ишонмаслигини, шунга қарамай, охиригача курашиб, фарзандлари билан бирга оиласи бошлиғини ҳимоя қилишини таъкидлади.
SOURCE: “Озодлик”
April 22nd, 2006
“Серқуёш Ўзбекистон” коалицияси раҳбари Санжар Умаров 7 апрель куни 50 ёшга тўлади. Тошкент шаҳри суди қарори билан 6 март куни 10 йилу 8 ой муддатга озодликдан маҳрум этилган С.Умаров бу санани қамоқда кутиб олади.
С.Умаровнинг адвокати Виталий Красиловский сўзларига кўра, ҳукм чиқарилгандан буён суд расмийлари коалиция етакчисининг ўз ҳимоячиси билан учрашувига рухсат бермаяпти.
“28 мартдан буён шу пайтгача учрашув учун рухсат ололмаяпман. Негалигини ҳеч ким тушунтирмаяпти. Мутасаддиларнинг “эртага келинги” сира тугамаяпти. Охирги сафар 6 апрель куни соат 9:30 келишим айтилганди. Борганимда эса эртага албатта рухсат берилиши айтилди. 7 апрель куни аппеляция суди С.Умаров ишини кўриб чиқиши керак”, – деди В.Красиловский.
Айни пайтда С.Умаровнинг оиласи АҚШда яшамоқда. Унинг рафиқаси Индира Умарованинг айтишича, суд тугагандан буён эридан ҳеч қандай хабар йўқ.
“Адвокати у билан учрашишга, жисмоний ва руҳий аҳволи қандайлигини билишга ҳаракат қиляпти. Бироқ бунга турли тўсиқлар қўйиляпти. Суд тугаганига бир ой бўлай деяпти. Бир одамни шунча йилга қамаб, ушлаб туришган бўлса-ю, унинг адвокати билан учрашишга ҳуқуқи бўлмаса”, – дейди И.Умарова.
С.Умаровнинг тўнғич фарзанди Ғулом Умаров отасининг адолатсиз қамоққа олингани ва бу Ўзбекистонда инсон ҳуқуқларининг қанчалар топталаëтганини яна бир бор яққол намойиш этишини таъкидлади.
“Бизнинг, хусусан, коалициянинг мақсади отамга ва шу билан бирга, Ўзбекистоннинг аксарият фуқароларига нисбатан адолатсизлик бўлаëтганини исбот қилишдир. Ўзбекистонда инсон ҳуқуқларига умуман риоя қилинмайди. Биз буни ҳужжатлар асосида исботламоқчимиз. Ўзбекистонда қонун доирасида ҳеч нима қилиб бўлмайди, қонунлар ишламайди. Коалициянинг мақсади қонунни қандай қилиб бўлса-да, ишга туширишдир”, – деди Ғ.Умаров.
Оила аъзолари 7 апрель куни Санжар Умаров 50 ёшга тўлишини маълум қилди ва “Озодлик” радиоси орқали ўз табрикларини йўллади.
“Бу санани жуда кутган эдик, тайёргарлик қилаётгандик. Бироқ тақдир бизни жисмонан айирди. Аммо руҳан биз доим биргамиз. Мен уларга тақдир синовларига ғурур билан бардош беришларини тилардим. Чунки таянадиган оилалари бор. Фарзандлари уни жуда ҳам яхши кўради, яқин кунларда кўришишни орзиқиб кутиб қолади. Оиласи бошни мағрур кўтариб, отасининг ишлари учун қаддини тик тутиб юриши мумкин. Бунинг учун уларга катта раҳмат”, – деди И.Умарова.
“Мен дадамга ҳеч нимадан афсусланманг, деб айтмоқчиман. Нима қилган бўлсалар, ҳаммаси тўғри. Буни ҳамма тушунади. Мен ҳозирги пайтда дадамга фақат кучли соғлиқ тилайман”, – дея табрикка қўшилди С.Умаровнинг яна бир ўғли Арслон.
Тошкент шаҳри суди С.Умаровни оғир иқтисодий жиноятлар, хусусан, ноқонуний топилган пулни қонунийлаштириш, солиқ тўлашдан бош тортиш каби қилмишларда айбдор топган. Тарафдорлари эса С.Умаров сиёсий фаолияти туфайли шундай жазога йўлиққанини айтяпти.
AUDIO (LINK) 6 апрел 2006 – 14:30
SOURCE: Ozodlik.org
April 6th, 2006
Radio broadcast (in Uzbek) too listen click: Real Audio, Windows Media
SOURCE: Radio Free Europe/Radio Liberty, Uzbek Service – Ozodlik.org (March 9, 2006; 16:30)
Mar 9, '06
Жиноят ишлари бўйича Тошкент шаҳар маҳкамаси мухолифатдаги “Серқуёш Ўзбекистоним” коалицияси раҳбари Санжар Умаровни ўн йил саккиз ой муддатга озодликдан маҳрум этиш ҳақида ҳукм чиқарган.
Ҳукмга кўра, Санжар Умаровга қўйилган уюшган жиноий гуруҳ тузиш, хориждаги сохта ширкатлар ҳисобига йирик миқдордаги маблағ ўтказиб, ноқонуний даромад топиш,
солиқ тўлашдан бўйин товлаш айбловлари маҳкамада ўз исботини топган.
Санжар Умаровдан 8 миллион АҚШ доллари миқдоридаги маблағ ундирилишини эълон қилган маҳкама ҳаками Зокиржон Исаев.
Исаевга кўра, Умаровга содир этган иқтисодий жиноятлари учун ўн тўрт ярим йиллик қамоқ жазоси белгиланган, Ўзбекистон президентининг амнистияси қўлланилиб жазо муддати камайтирилган.
Аммо бу маҳкама бошидан сиёсий маҳкама сифатида кўриб келинган.
Санжар Умаров ҳимоячиси қўйилган айбловлардан бирортаси маҳкама жараёнида исботланмаганини, ушбу ҳукм устидан аппелляция аризаси билан мурожаат қилишларини билдирган.
1 март куни “Серқуёш Ўзбекистоним” коалицияси мувофиқлаштирувчиси Нодира Ҳидоятова устидан ҳам ўн йил муддатга озодликдан маҳрум этиш тўғрисида ҳукм ўқилганди.
SOURCE: BBC Uzbek
March 7th, 2006
Amerika Ovozi
O’zbekiston sudi “Serquyosh O’zbekistonim” koalitsiyasi rahbari Sanjar Umarovni iqtisodiy jinoyatlarda ayblab, deyarli 11 yillik qamoq jazosiga mahkum qildi. Muxbirimiz Liza MakAdamsning xabar berishicha, Umarovning advokatlari hukm ustidan appelyatsiya tartibida murojaat qilmoqchi. Tanqidchilar nazarida, hukm ortida siyosiy sabablar yotibdi.
Inson huquqlari bo’yicha Human Rights Watch tashkilotining Moskvadagi idorasi rahbari Ellison Gillga ko’ra, Umarovning yagona aybi – Andijonda hukumat qo’shinlarining namoyishchilarga qarshi ortiqcha kuch ishlatgani haqida ochiqdan-ochiq gapirganidir.
– O’zbekiston hukumati tanqidni ko’tara olmaydi. Inson huquqlari faollari va muxolifatchilara qarshi chora ko’ryapti. O’tgan haftada Nodira Hidoyatova, endi esa Sanjar Umarov qamoqqa tashlandi. Tuzum o’z tanqidchilarining og’zini yopayapti, deydi Human Rights Watch vakili.
O’tgan yilning dekabr oyigacha tashkilotning Toshkentdagi idorasini boshqarib kelgan Gill xonim, O’zbekistonda Andijon voqealaridan beri fuqarolik jamiyati bosim ostida, deydi.
– Hukumat mahalliy va xorijiy no-hukumat tashkilotlarni yopayapti. Muxolifatchi va inson huquqlari faollari deyarli har kuni kaltaklanadi. Sud Freedom House tashkilotini yopilsin, deya qaror chiqardi. Fikrimcha, Yevrosiyo Jamg’armasi ham yopilish arafasida.
Unga ko’ra, hukumat nazarida, xorijiy tashkilotlar boshqa davlatlarda, jumladan Qirg’izistonda siyosiy muxolifatni hokimiyat tepasiga keltirishga yordam bergan.
Muxbirimiz Liza MakAdamsning xabar berishicha, Human Rights Watch tashkiloti O’zbekiston hukumatini so’z erkinligi va odamlarning uyushish huquqini himoya qilishga chaqirib keladi. Gill xonimga ko’ra, O’zbekiston bu chaqiriqlarga javob berganicha yo’q.
SOURCE: Voice of America
March 7th, 2006
Malik Mansur
Toshkent
Jinoiy ishlar bo`yicha Toshkent shahar sudi esa muxolifatdagi “Serquyosh O`zbekistonim” koalitsiyasi raisi Sanjar Umarovni iqtisodiy jinoyatlarda ayblab o’n to’rt yarim yillik qamoq jazosiga hukm qildi. Ammo jazo amnistiya tufayli 10 yildan sal ko’proq davrga tushirilgan.
Sud qaroriga ko`ra qamoq jazosidan tashqari Sanjar Umarov va koalitsiyaning muvofiqlashtiruvchisi Nodira Hidoyatovadan 500 million so`mga yaqin mablag’ni davlat hisobiga undirib olish belgilanadi. Sanjar Umarovning advokati Vitaliy Krasilovskiyga ko`ra Umarovga nisbatan ayblovlar o`z tasdig`ini topmagan va hukm ustidan shikoyat kiritiladi.
“Serquyosh O`zbekistonim” koalitsiyasi vakili, “Ozod dehqonlar” partiyasi rahbari Nigora Hidoyatovaga ko`ra, siyosiy faoliyat uchun chiqarilayotgan hukmning adolatli bo`lishi kutilmagan ham.
– O`zbekiston Konstitutsiyasida 93 modda bor. Unga ko`ra barcha sudyalar Prezident tomonidan tayinlanadi. Bu modda o`z kuchida ekan, O`zbekistonda adolatli hukmga umid qilish mumkin emas. Chunki sud tizimi Prezidentning qo`lida va u qaror chiqaradi, – deydi Nigora Hidoyatova.
“Serquyosh O`zbekistonim” koalitsiyasining muvofiqlashtiruvchisi Nodira Hidoyatova shunday ayblovlar bilan 10 yil qamoq jazosiga hukm qilingan edi.
Kuzatuvchilar xalqaro tashkilotni yopish haqidagi qarorni va muxolifat vakillari ustidan chiqarilgan hukmni qonunbuzarlik sabab emas, balki siyosiy bosimlar orqali amalga oshirilmoqda, deb hisoblashadi.
Yaqinda yana bir xalqaro tashkilot “Evroosiyo” jamg`armasi ustidan ham jamg`arma faoliyatini tugatish borasida mahkama jarayoni boshlanishi kutilmoqda. Mazkur jamg`arma o`z mablag`ini maqsadga muvofiq ravishda ishlatmaganlikda, turli nodavlat tashkilotlarga ko`mak ko`rsatganlikda ayblanmoqda. Mavjud fikrlarga ko`ra hukumat demokratik islohotlar yo`lidagi har qanday hamkorliklarni keskin to`xtatish yo`liga o`tmoqda.
Bu haqda kuzatuvchilardan biri yozuvchi Zohir A`lam shunday deydi:
– Hukumat, bu bilan biz bilan hech qanday munozara qilish mumkin emas, demoqchi. Mening kichkina bir oppozitsiyaga ham qilgan javobim shu – qamoq, ta`qib va boshqa narsa, demoqchi. Kichkinagina oppozitsiyani ham eshitgisi yoq. Xalqaro tashkilotlar ham shu: ular demokratiyaga xizmat qilmoqchi bo`lsa, yopilayapti. O`zbekiston hukumati demokratik islohotlar bo`yicha har qanday muzokaralarni inkor etayapti, – deydi Zohir A`lam.
SOURCE: Voice of America
March 6th, 2006
Жиноят ишлари бўйича Тошкент шаҳар маҳкамаси мухолифатдаги “Серқуёш Ўзбекистоним” коалицияси раҳбари Санжар Умаровни ўн йил саккиз ой муддатга озодликдан маҳрум этиш ҳақида ҳукм чиқарган.
Ҳукмга кўра, Санжар Умаровга қўйилган уюшган жиноий гуруҳ тузиш, хориждаги сохта ширкатлар ҳисобига йирик миқдордаги маблағ ўтказиб, ноқонуний даромад топиш,
солиқ тўлашдан бўйин товлаш айбловлари маҳкамада ўз исботини топган.
Санжар Умаровдан 8 миллион АҚШ доллари миқдоридаги маблағ ундирилишини эълон қилган маҳкама ҳаками Зокиржон Исаев.
Исаевга кўра, Умаровга содир этган иқтисодий жиноятлари учун ўн тўрт ярим йиллик қамоқ жазоси белгиланган, Ўзбекистон президентининг амнистияси қўлланилиб жазо муддати камайтирилган.
Аммо бу маҳкама бошидан сиёсий маҳкама сифатида кўриб келинган.
Санжар Умаров ҳимоячиси қўйилган айбловлардан бирортаси маҳкама жараёнида исботланмаганини, ушбу ҳукм устидан аппелляция аризаси билан мурожаат қилишларини билдирган.
1 март куни “Серқуёш Ўзбекистоним” коалицияси мувофиқлаштирувчиси Нодира Ҳидоятова устидан ҳам ўн йил муддатга озодликдан маҳрум этиш тўғрисида ҳукм ўқилганди.
SOURCE: BBC Uzbek
March 6th, 2006
Jinoiy ishlar bo`yicha Toshkent shahar sudi esa muxolifatdagi “Serquyosh O`zbekistonim” koalitsiyasi raisi Sanjar Umarovni iqtisodiy jinoyatlarda ayblab o’n to’rt yarim yillik qamoq jazosiga hukm qildi. Ammo jazo amnistiya tufayli 10 yildan sal ko’proq davrga tushirilgan.
Sud qaroriga ko`ra qamoq jazosidan tashqari Sanjar Umarov va koalitsiyaning muvofiqlashtiruvchisi Nodira Hidoyatovadan 500 million so`mga yaqin mablag’ni davlat hisobiga undirib olish belgilanadi. Sanjar Umarovning advokati Vitaliy Krasilovskiyga ko`ra Umarovga nisbatan ayblovlar o`z tasdig`ini topmagan va hukm ustidan shikoyat kiritiladi.
“Serquyosh O`zbekistonim” koalitsiyasi vakili, “Ozod dehqonlar” partiyasi rahbari Nigora Hidoyatovaga ko`ra, siyosiy faoliyat uchun chiqarilayotgan hukmning adolatli bo`lishi kutilmagan ham.
– O`zbekiston Konstitutsiyasida 93 modda bor. Unga ko`ra barcha sudyalar Prezident tomonidan tayinlanadi. Bu modda o`z kuchida ekan, O`zbekistonda adolatli hukmga umid qilish mumkin emas. Chunki sud tizimi Prezidentning qo`lida va u qaror chiqaradi, – deydi Nigora Hidoyatova.
“Serquyosh O`zbekistonim” koalitsiyasining muvofiqlashtiruvchisi Nodira Hidoyatova shunday ayblovlar bilan 10 yil qamoq jazosiga hukm qilingan edi.
Kuzatuvchilar xalqaro tashkilotni yopish haqidagi qarorni va muxolifat vakillari ustidan chiqarilgan hukmni qonunbuzarlik sabab emas, balki siyosiy bosimlar orqali amalga oshirilmoqda, deb hisoblashadi.
Yaqinda yana bir xalqaro tashkilot “Evroosiyo” jamg`armasi ustidan ham jamg`arma faoliyatini tugatish borasida mahkama jarayoni boshlanishi kutilmoqda. Mazkur jamg`arma o`z mablag`ini maqsadga muvofiq ravishda ishlatmaganlikda, turli nodavlat tashkilotlarga ko`mak ko`rsatganlikda ayblanmoqda. Mavjud fikrlarga ko`ra hukumat demokratik islohotlar yo`lidagi har qanday hamkorliklarni keskin to`xtatish yo`liga o`tmoqda.
Bu haqda kuzatuvchilardan biri yozuvchi Zohir A`lam shunday deydi:
– Hukumat, bu bilan biz bilan hech qanday munozara qilish mumkin emas, demoqchi. Mening kichkina bir oppozitsiyaga ham qilgan javobim shu – qamoq, ta`qib va boshqa narsa, demoqchi. Kichkinagina oppozitsiyani ham eshitgisi yoq. Xalqaro tashkilotlar ham shu: ular demokratiyaga xizmat qilmoqchi bo`lsa, yopilayapti. O`zbekiston hukumati demokratik islohotlar bo`yicha har qanday muzokaralarni inkor etayapti, – deydi Zohir A`lam.
SOURCE: Voice of America
March 6th, 2006
Тошкент шаҳар маҳкамаси ҳаками Зокир Исаев, Нодира Ҳидоятованинг айби тўла исботланди, деб айтган. Ҳидоятова 10 йиллик қамоқ жазосига ҳукм этилиши билан бирга давлатга келтирилган зиён, деб айтилаётган 230 минг АҚШ доллари миқдорида жаримага тортилган. Нодиранинг опаси, мухолифатдаги “Озод деҳқонлар” партияси котибаси
Нигора Ҳидоятова якунланган маҳкама борасида Би-би-сига интервью берган.
Нигора Ҳидоятова: – Биз бу ҳукмни кутган эдик, шундай бўлишини билардик. Бундан кам жазо беришларига умид ҳам қилмагандик. Чунки бу қасддан, шафқатсизларча қилинаётган бир ҳаракатдир. Бу бошқаларни ҳам қўрқитиб қўйиш учун ўтказилган бир маҳкама, деб ҳисоблайман мен. Ўтган йил Олий судда “Акромийлар” деб аталган гуруҳ устидан ўтган томоша маҳкамаси ёдингизда бўлса керак. Нодиранинг устидан ўтказилган маҳкама ҳам ана шундай маҳкама, фақат судланган одам бошқа бўлди, холос.
Би-би-си: – Нодира Ҳидоятованинг қамоққа ташланиши сизлар мансуб бўлган “Серқуёш Ўзбекистоним” коалициясининг бундан кейинги фаолиятига қандай таъсир кўрсатади, деб ўйлайсиз?
Нигора Ҳидоятова: – Ҳеч қандай таъсир қилмайди. Бизнинг бундан руҳимиз тушгани йўқ. Биз учун кураш ҳали олдинда. Бизнинг тарафдорларимиз жуда кўп, аъзоларимиз сони кўпайиб бормоқда. Қайтага маҳкама жараёни сабаб бизнинг жамоатчилик орасидаги нуфузимиз ошди. Одамлар, маҳкама жараёнини яқиндан кузатишди. Талабалар суд жараёни ҳақидаги интернет хабарларини ўқиб боришаётганини биз биламиз. Шу маънода мен маҳкама жараёнидан қониқдим, гарчи биз ўтган бир йил мобайнида жуда кўп қурбон берган бўлсак-да. Сиз биласиз, менинг турмуш ўртоғимни ўлдиришди, мана энди синглимни ҳам қамоққа ташлашмоқда. Аммо шунга қарамасдан, биз бу азобларга тайёрмиз ва курашни давом эттирамиз.
Би-би-си: – Яъни сиз коалициянгизнинг икки кўзга кўринган аъзолари -Санжар Умаров ва Нодира Ҳидоятоваларнинг маҳкум этилишидан сўнг ҳам Ўзбекистонда сиёсий фаолиятни давом эттириш мумкин, деб ишонасиз, шундайми?
Нигора Ҳидоятова: – Биз янада қатъийроқ ва каттароқ куч билан ҳаракат бошлаймиз. Бизни қўллаб-қувватлаётган ишбилармонларнинг кўпчилиги ҳозир яширинча фаолият йўлига ўтишди. Улар бизни ҳар томонлама дастаклаб туришибди. Улар вазиятни ўзгартиришни исташади. Хабарингиз бўлса, шу кунларда Фарғона водийсида куч тизимлари тадбиркорларга қарши яна таъқибларни кучайтиришган. Ҳукуматнинг машҳур 154-қарорига мувофиқ яна тадбиркорларнинг мол-мулклари тортиб олиниб, мусодара қилинмоқда. Қолаверса, бу маҳкама жараёнларидан фақат биз жабр чекаётганимиз йўқ. Масалан, мен икки ҳимоячи билан гаплашдим. Ҳаётида Санжар Умаровни кўрмаган, номини ҳам эшитмаган одамлар – автобаза раҳбарларини ҳам Санжар Умаров билан битта жиноий гуруҳ сифатида кўришаяпти экан. Ҳозирда Тошкентнинг Ц-5 мавзеъида террорзимга қарши кураш бўйича йирик штаб ташкил этилган ва бу штаб аъзолари Санжар Умаровнинг қўл телефонидан топилган рақамлар бўйича одамларни бирма-бир суроққа чақириб, тергов қилишмоқда.
Би-би-си: – Сизлар бошқа мухолифат гуруҳларидан фарқли ўлароқ, бир йил мобайнида ҳукуматни мулоқотга чақириб келдингиз, ҳукумат эса бунга сизнинг фаолларингизни қамоққа ташлаш билан жавоб қайтарди. Ҳозирда ҳам ҳукумат билан мулоқотнинг имкони бор, деб ўйлайсизми?
Нигора Ҳидоятова: – Ҳукумат ўзининг мулоқотга қодир эмаслигини намойиш этди ва ҳозирда мулоқот уринишларининг ҳаммаси пучга чиқди. Бизнинг-ча, Ўзбекистонда юзага келган вазиятдан чиқишнинг ягона йўли, бу – ҳукуматга ташқаридан босим ўтказиш ва Ўзбекистон ичкарисида жамиятнинг ўзгаришлар ғояси атрофида бирлашишидир. Ҳозирда жамият, ниҳоят уйғона бошлади ва бизнинг бу уйғонишдан умидларимиз катта.
SOURCE: BBC Uzbek
March 1st, 2006
“Серқуёш Ўзбекистоним” коалицияси раҳбарларидан бири Нодира Ҳидоятова 10 йил қамоқ жазосига ҳукм этилган. У солиқ тўлашдан бош тортиш ва ноқонуний пул ўзлаштиришда айбдор деб топилган.
Тошкент шаҳар маҳкамаси мухолифатдаги “Серқуёш Ўзбекистоним” коалицияси мувофиқлаштирувчиси Нодира Ҳидоятовани ўн йилга озодликдан маҳрум этиш ҳақида ҳукм чиқарган.
Ҳукмга кўра, у иқтисодий жиноятларни содир этган, аммо мухолифат гуруҳи маҳкама ортида сиёсий сабаблар турганини иддао қилади.
Икки фарзанднинг онаси Нодира Ҳидоятова раҳбарларидан бўлган “Серқуёш Ўзбекистоним” коалицияси Андижон воқеаларидан сўнг ҳукуматни зўр бериб сиёсий ва иқтисодий ислоҳотларни бошлашга чақириб келган.
Коалиция раҳбари Санжар Умаров ҳам иқтисодий жиноятларда айбланиб, маҳкамага тортилган ва прокурор унга ўн саккиз йиллик қамоқ жазоси берилишини сўраган.
Ўзбекистон Бош прокуратураси мухолифатдаги “Серқуёш Ўзбекистоним” коалицияси раҳбарларини бир уюшган жиноий гуруҳ аъзолари, деб ҳисоблайди.
Москвадан қайтаётган Нодира Ҳидоятова ўтган йилнинг 19 декабр тунида Тошкент аэропортида ҳибсга олинганди.
Яқин кунларда “Серқуёш Ўзбекистоним” коалицияси раҳбари Санжар Умаров устидан кечаётган маҳкаманинг ҳам якунланиши кутилмоқда.
SOURCE: BBC Uzbek
March 1st, 2006
У шунингдек¸ тергов давомида унга нисбатан қўйилаëтган айбловларни тан олиши лозимлиги¸ акс ҳолда қийноққа солиниши ҳақида огоҳлантирилиб тазйиқ ўтказилганини айтган.
Санжар Умаров устидан ўтказилаëтган судловнинг яқин кунларда якунига етиши кутилмоқда. Прокурор Умаровнинг 18 йилга озодликдан маҳрум этилишини талаб қилмоқда.
Коалиция мувофиқлаштирувчиси Нодира Ҳидоятова учун эса¸ прокурор 12 йил сўраган эди.
“Серқуëш Ўзбекистон “ коалицияси 2005 йил 13 май воқеаларидан сўнг¸ ҳукуматни танқид қилиб келаëтган эди.
SOURCE: Ozodlik.Org
February 27th, 2006
Тошкентда “Серқуёш Ўзбекистоним” коалицияси раҳбари Санжар Умаров устидан ўтаётган маҳкамада давлат айбловчиси унга 18 йил қамоқ жазоси берилишини сўраган.
Давлат айбловчиси Умаров жиноятлари исботланган, деб ҳисоблайди
Прокурор Геннадий Давлетов дастлабки тергов ҳамда маҳкама терговлари мобайнида Санжар Умаровга қўйилган айбловлар ўз исботини топди, деб айтган.
Прокурор Санжар Умаров ҳамда унинг жиноий шериклари деб кўрилаётган шахсларга турли йиллик қамоқ жазолари белгилаш ва айни пайтда Ўзбекистон Президентининг декабр ойида эълон қилган авфи амал қилаётганини инобатга олиб айбланувчиларга амнистия қўллаб жазо муддатларининг тўртдан бирини қисқартиришни сўраган.
Мухолифатдаги “Серқуёш Ўзбекистоним” коалицияси раиси Санжар Умаров ўтган йили октябрида Ўзбекистон парламентига мамлакатда ислоҳотлар ўтказишни муҳокама этишга чақириб ёзган мурожаатидан сўнг ҳибсга олинган, унга Ўзбекистон Жиноят кодексининг жиноий йўл билан топилган маблағларни легаллаштириш, солиқ тўлашдан бўйин товлаш, йирик миқдордаги маблағни ўзлаштириш, пора бериш каби саккиз банди бўйича айб қўйилган.
Санжар Умаров ўзига қўйилган айбловларни тан олмаган.
“Серқуёш Ўзбекистоним” коалициясининг мувофиқлаштирувчиси Нодира Ҳидоятова устидан ўтаётган маҳкамада ҳам давлат қораловчиси уни 12 йилга озодликдан маҳрум этишни сўраган.
Санжар Умаров ҳам, Нодира Ҳидоятова ҳам иқтисодий айбловларда айбланишмоқда, бироқ мухолифатчилар тарафдорлари уларнинг сиёсий фаолияти туфайли ҳукумат томонидан таъқиб қилинаётганини айтишади.
Коалиция раҳбарлари устидан кейинги ҳафтада ҳукм ўқилиши кутилмоқда.
SOURCE: BBC Uzbek
February 24th, 2006
Malik Mansur
Toshkent
Iqtisodiy jinoyatlarda ayblanayotgan muxolifatdagi “Serquyosh O`zbekiston” milliy birlik koalitsiyasi muvofiqlashtiruvchisi Nodira Hidoyatova ustidan kechayotgan mahkama jarayonlari o’z nihoyasiga yetmoqda. Davlat ayblovchisi suddan Nodira Hidoyatovaga 12 yil qamoq jazosi belgilashni so`ramoqda.
Nodira Hidoyatova O`zbekiston jinoyat kodeksining sakkizga yaqin moddalari bo’yicha ayblanmoqda.
Sud jarayonida ishtirok etayotgan inson huquqlari himoyachisi Surat Ikromovga ko`ra, davlat ayblovchisining “Nodira Hidoyatovaga nisbatan qo`yilgan ayblovlar o`z tasdig`ini topdi” degan fikri himoya tomonidan keskin e’tirozga uchragan.
“Qo’yilgan jinoiy moddalar tasdig`ini topdi, deb aytildi, ammo Hidoyatovaning himoyachisi Babenko chiqib, shuncha guvohlar so`roq qilindi, ko`rsatmalar berildi, qo’yilgan aybnomalar o`z tasdig`ini topmaganini ta’kidlab o`tdi”, deydi Surat Ikromov.
O`zbekiston prokuraturasi “Serquyosh O`zbekiston” milliy birlik koalitsiyasi yetakchilarini uyushgan ravishda uyushtirilgan iqtisodiy jinoyatlarda aybdor topmoqda.
Muxolif koalitsiya vakillariga ko`ra esa, sud jarayonlari ularning siyosiy faoliyatalari bilan bog`liq.
Koalitsiya tarkibidagi “Ozod dehqonlar” partiyasining raisi Nigora Hidoyatova sud jarayonlarining sababini O`zbekiston hukumatini siyosiy faol bo`lgan qatlamga, muxolif partiyalarga nisbatan yuritayotgan tayziqlarida ko`radi.
Nodira Hidoyatova ustidan kechayotgan mahkama jarayoni 24 fevralga qoldirilgan. Unda Nodira Hidoyatovaga hukm oldidan so`nggi so`z berilishi kutilmoqda.
SOURCE: Voice of America
February 18th, 2006
Malik Mansur
Toshkent
O`zbekiston va Rossiya o`rtasida imzolangan ittifoqchilik shartnomasidan so`ng aloqalar jadal ravishda rivojlanib bormoqda.
O`zbek muxolifat vakillari Rossiyaning O`zbekiston uchun muhim hamkor ekanini urg’ulashadi. Muxolifatdagi “Erk” demokratik partiyasining Bosh kotibi Otanazar Oripov shunday mulohazalar bildiradi:
“Hamma sohalarda aloqalar yaxshi bo`lishi kerak, lekin hozirgi o`rnatilgan aloqalarni men xalqlar o`rtasidagi aloqalar deb ayta olmayman. O`zbekiston hukumati necha yillar davomida Rossiya siyosatini, bo`layotgan ishlarni tanqid qilib keldi. Boshqa davlatlar bilan aloqalar izladi, qurdi va birdaniga o`zgarib qolgani yaxshilikka deb o`ylamayman”.
O`zbekistondagi muxolifat vakillariga ko`ra ular Rossiyagi demokratik kuchlar bilan muloqotga tayyor. Rossiya hukumati doiralari bilan shunday muloqot boshlash lozimligi tashabbusini ko`targan muxolifatdagi “Serquyosh O`zbekistonim” koalitsiyasi bu borada Rosssiya prezidenti, jumladan, Rossiya Dumasi rahbari Boris Grizlovga ham ochiq xat bilan murojat qilgan edi.
Biroq o`zbek muxolifatining murojaatlariga Rossiya rasmiy doiralari tomonidan munosabat bildirilgani haqida malumotlar yo`q. Bu tashabbus muallifi, muxolifatchi Sanjar Umarov ustidan sud jarayonlari davom etmoqda.
Rossiya prezidenti Vladimir Putinning aytishicha, Rossiya O`zbekistonda demokratik qadriyatlarni tiklash uchun ehtiyotkorlik bilan harakat qiladi.
Otanazar Oripovga ko`ra, Rossiya prezidenti bu bilan O`zbekiston hukumatining kirdikorlaridan xabardorligini, biroq o’z manfaatlardan kelib chiqib, hozircha shunday aloqzlarni o`rnatishga majburligini bildirgan.
“Shuning uchun buni O`zbekiston prezidentining hatti-harakatlarini qo`llab-quvvatlayapti, deb o`ylamayman”, – deydi Otanazar Oripov.
Mahalliy kuzatuvchilarning fikricha, Rossiya o`z milliy manfaatlaridan kelib chiqqan holda O`zbekistonda hozirgi mavjud tuzumning hukm surishidan manfaatdordir. Kuzatuvchilar O`zbekistondagi va Rossiyadagi tuzumlarning o`xshashligi va shu bois Rossiya Andijondagi otishmalardan so`ng O`zbekiston hukumatini quvvatlagani, Rossiya bilan hamkorlikda demokratik islohotlar muhokamasi ortiqcha ekanligi haqida gapirishadi.
Sharhlovchi Komron Aliyevga ko`ra, Rossiyaning O`zbekiston hukumatini qo`llashi avvalo hukumatlarning bir xil tuzumga egaligi va Rossiyada imeriyacha siyosatning tiklanayotganligi bilan bo`gliq.
“Rossiya o`zini sobiq ittifoq hududidagi bir qator davlatlarni birlashtirgan yetakchi davlat sifatida ko`rsatmoqchi. Shuning uchun Markaziy Osiyo Hamkorlik Tashkilotini Yevrosiyo Iqtisodiy Hamkorligiga qo`shish bilan tugatishga majbur qildi. Bundan tashqari Rossiya mintaqa davlatlarini o`z tovarlarini o`tkazish mumkin bo`lgan kolonial davlatlarga aylantirishni rejalamoqda”, – deydi Komron Aliyev.
O`zbekiston prezidenti Islom Karimov Rossiyaga qilgan oxirgi tashrifi chog`ida xavfsizlik masalariga to`xtalgan va Rossiya bilan tuzilgan shartnomalarning O`zbekiston mustaqilligini saqlab qolishdagi ahamiyati haqida gapirgan edi.
Ayrim kuzatuvchilarning fikricha, Rossiya tashqi siyosatidagi asosiy tirgak bo`lgan energetika strategiyasi ko`p jihatdan Markaziy Osiyo mintaqasidagi energetik zahiralarni egallash bilan ham bog`liq. Bu borada O`zbekneftgaz milliy xolding kompaniyasi bilan tuzilgan so`nggi shartnomalar Rossiya hukumati uchun qulay imkoniyatlar yaratmoqda.
Mahalliy ekspertlardan biri Bahodir Musaevga ko`ra, O`zbekiston hukumati Rossiya energetika siyosatiga yaratilayotgan imkoniyatlar evaziga faqatgina avtoritar tuzum xafsizligini kafolatlash shartini qo`ymoqda.
“Hukumat bugun har qachongidan ko`ra kuchaygan. Chunki Rossiya u tomonda. Rossiya o`z geosiyosiy maqsadlari uchun O`zbekiston prezidentining har qanday ichki siyosatini qo`llab-quvvatlashga tayyor. Rossiya bilan hamkorlikdan ko`zlangan asosiy manfaatlaridan biri shu”, – deydi Bahodir Musayev.
SOURCE: Voice of America
February 14th, 2006
“Серқуёш Ўзбекистоним” коалицияси раҳбари Санжар Умаров ва унинг шериклари деб кўрилаётган тўрт киши устидан ўтаётган маҳкамада гувоҳлар сўроқ қилинган. Гувоҳлардан икки нафари Санжар Умаров ўзларига пора бергани ҳақида кўрсатма берган, уч гувоҳ эса Умаровни умуман танимаслигини айтган.
Жиноят ишлари бўйича Тошкент шаҳар маҳкамасида ўтаётган суднинг очиқ экани эълон қилинган, бироқ жараён ўтказилаётган хона кичиклиги боис маҳкамани кузатиш учун келган хорижий дипломатлар, инсон ҳуқуқларини ҳимоя қилиш ташкилотлари вакиллари ва журналистларнинг ҳаммаси ҳам суд залига кира олмаганлар.
Ўзининг октябр ойида номаълум кишилар томонидан автомобилга мажбурлаб киритилгани, ноқонуний ҳибсга олинганини айтган Санжар Умаров ноябр ойи бошигача бўлган воқеалардан ҳеч нарсани эслолмайман, деган.
Соғлиги ёмонлашгани ҳақида қамоқхона маъмурларига бир неча маротаба мурожаат қилганига қарамасдан ўзига тиббий ёрдам кўрсатилмаганини билдирган у.
Санжар Умаров ўзига нисбатан қўзғатилган жиноят ишини уюштирилган, деб атаган ва ҳужжатлар қалбакилаштирилган, деб айтган.
Ўзига қўйилган айбловларни инкор этаркан, “мен пора берган ёки кимлардандир пора олган бўлсам, нега улар мен билан бирга бу қафаснинг ичида эмаслар?”,- дея савол берган Санжар Умаров.
“Серқуёш Ўзбекистоним” коалицияси раҳбари Санжар Умаров йирик миқдордаги маблағни ўзлаштириш, пора бериш сингари иқтисодий бандларда айбланиб ҳибсга олинганди.
“Серқуёш Ўзбекистоним” коалицияси мамлакатда иқтисодий ва сиёсий ислоҳотлар ўтказишни талаб қилиб чиққан, унинг раҳбарлари Ўзбекистон расмийларини Андижондаги намойишни бостиришда айблагандилар.
Коалиция мувофиқлаштирувчиси Нодира Ҳидоятова устидан ҳам маҳкама жараёни кетаётир, у ҳам иқтисодий жиноятларда айбланмоқда.
“Серқуёш Ўзбекистоним” коалицияси фаоллари, Нодира Ҳидоятова ҳамда Санжар Умаров ҳибсга олинишининг асл сабаби мухолифатнинг сиёсий фаолиятини тўхтатиш, деб биладилар.
SOURCE: BBCUzbek
February 6th, 2006
Jinoyat ishlari boЎ¦yicha Toshkent shahar sudida muxolifatdagi “Serquyosh O`zbekistonim” koalitsiyasi raisi Sanjar Umarov ustidan sud jarayoni boshlangan. Toshkent viloyatida esa inson huquqlari himoyachisi Mo`tabar Tojiboyeva ishi bo’yicha ham sud hay’ati oЎ¦z ishini davom ettirmoqda.
Sanjar Umarov va uning singlisi, muxolifat vakili Nodira Hidoyatovalar ustidan o`tayotgan jarayonlar ochiq, biroq alohida tartibda o`tmoqda. Har ikki jarayonga ham Toshkent shahar sudyasi Zokirjon Isaev raislik qilmoqda. 30 yanvar kuni Sanjar Umarov ustidan boshlangan jarayonga bir qator inson huquqlari himoyachilari, xalqaro diplomatik korpus vakillari ham ishtirok etishdi.
Boshlangan jarayon jinoyatda gumon qilinayotganlar va jinoiy ishi bilan tanishtirish bilan tugatildi. Sud 3 fevralga qadar tanaffus e`lon qildi.
Shu kuni muxolifatdagi koalitsiyaning muvofiqlashtiruvchisi Nodira Hidoyatova ustidan ham navbatdagi mahkama jarayoni bo`lib o`tdi. Sud raisi Nodira Hidoyatovaning sudni yopiq o`tkazish haqidagi iltimosini inobatga olmagan va qonunchilikka ko`ra ochiq tarzda o`tkazishni lozim topgan. Unda ham bir guruh inson huquqlari faollari va diplomatik korpus vakillari ishtirok etishdi. Jarayonda Nodira Hidoyatova o`ziga nisbatan qoyilgan ayblarni rad etdi va jinoiy ishni soxtalashtirilgan deb aytdi.
Muxolifatdagi koalitsiyaga kiruvchi Ў§Ozod dehqonlarЎЁ partiyasining raisasi Nigora Hidoyatova jarayonda Umarovning ishini uyushgan jinoyatchilik sifatida e’lon qilinishini asossiz deb hisoblaydi.
– Bugun jinoyat ishini uyushgan jinoiy guruh sifatida e’lon qilishdi, bu hech qanday asosga ega emas. Prokuratura avvaliga Sanjar, Abror Umarovlarning jinoiy guruh tuzganlilari haqidagi uzun xulosani o`qib, shu ishga Nodiraga qarshli firma va teatrdagi faoliatini qo`shmoqda. Bunga sabab Nodiraning Ў§Serquyosh O`zbekistonЎЁ koalitsiyasining muvofiqlashtiruvchisi bo`lib kelayotganidir, – deydi ayblanuvchilarning singlisi, muxolifat vakili Nigora Hidoyatova.
Nigora Hidoyatovaga koЎ¦ra, jinoiy ish qo`zg’alishining mohiyatida ularning siyosiy faoliyatlari yotganligini urg`ulaydi. O`zbekiston hukumati har qanday uyushmalarga yig`ilishdan, siyosiy faollikdan qo`rqadi.
30 yanvar kuni Toshkent viloyatining Quyi Chirchiq tumanida O`zbekiston jinoyat kodeksining 17-moddasi bilan ayblanayotgan Farg`onadagi Ў§O`t yuraklarЎЁ inson huquqlarini himoyalash klubi rahbari Mo`tabar Tojiboyeva ustidan ham sud jarayoni oЎ¦tmoqda.
Mo`tabar Tojiboyevani Farg`ona viloyati prokuraturasi firibgarlik, tovlamachilik, noqonuniy tashkilot tuzishda ayblagan. Tojiboyeva tergov surishturuv ishlari yakunlangandan so`ng Toshkentga olib kelingan edi.
Mo`tabar Tojiboyevaning nega aynan Toshkentda sud qilinayotgani maЎ¦lum emas. Uning advokatlari bu haqda maЎ¦lumotga ega emasliklarini aytishdi. Inson huquqlari himoyachilariga ko`ra esa FargЎ¦onadagi faol inson huquqlari himoyachisini viloyatdan uzoqroqda sud qilishni lozim topgan bo`lishlari mumkin.
Jinoiy ish mohiyati esa Mo`tabar Tojiboyevaning inson huquqlarini himoyalashga oid faoliyati bilan bog`liq deb qaralmoqda. Mo`tabar Tojiboyevaning advokati Husan Nurmatovning bildirishicha, jarayon bir hafta ichida nihoyasiga yetishi mumkin.
SOURCE: VOA
January 31st, 2006
Фарғоналик инсон ҳуқуқлари фаоли Мўътабар Тожибоева устидан бошланган судга ҳуқуқ ҳимоячилари киритлмаган.
Айни пайтда Тошкентда “Серқуёш Ўзбекистоним” коалицияси вакили Нодира Хидоятова устидан ҳам суд давом этди.
Шунингдек, “Серқуёш Ўзбекистоним” коалицияси етакчиси Санжар Умаров устидан судлов ўз ишини бошлади, лекин адвокатларга тайёрланиб олиш учун вақт бериш мақсадида жума кунгача танаффус эълон қилинди.
Ҳидоятова ҳам, Умаров ҳам пул ювганлик ва солиқ тўлашдан бўйин товлаганликда айбланмоқда.
“Серқуёш Ўзбекистоним” коалицияси вакиллари бу ишларнинг ортида сиёсий сабаблар борлигини таъкидламоқда.
Лекин Ўзбекистон бош прокуратураси матбуот вакили Светлана Ортиқова Озодликка берган суҳбатида, бундай таъкидларни инкор этди.
“Санжар Умаров ва унинг жиноий гуруҳи сиёсатга ҳеч қандай алоқаси бўлмаган иқтисодий жиноятни содир этган. Шунинг учун улар суд олдида жавоб берадилар. Жамиятга, давлатга ва одамларнинг хусусий манфаатларига келтирилган иқтисодий зиён учун улар албатта жавоб беридилар, деб ўйлайман. Яна бир марта таъкидлаб айтаманки, Санжар Умаров ва унинг жиноий гуруҳининг жиноий фаолияти сиёсатга ҳеч қандай алоқаси йўқ. Булар ғирт иқтисодий жиноятлардир”, – деди Ортиқова.
“Серқуёш Ўзбекистоним” коалицияси 2005 йилнинг апрелида тузилган. Андижон воқеаларидан кейин Ўзбекистон ҳукуматини кескин танқид қилиб келган.
SOURCE: Ozodlik
January 30th, 2006
Тошкентда Ўзбекистондаги норасмий “Серқуёш Ўзбекистоним” коалициясининг раҳбари Санжар Умаров устидан маҳкама бошланган. Унга маблағ ўзлаштириш, солиқ тўлашдан бўйин товлаш, пора бериш сингари айблар қўйилган.
Бироқ “Серқуёш Ўзбекистоним” коалицияси фаоллари Санжар Умаров сиёсий фаолияти учун ҳибсга олинган, деб ишонадилар.
У ўтган йили октябрида Ўзбекистон парламентига мурожаатнома юборганидан сўнг ҳибсга олинган эди.
Уч ой мобайнида ҳимоячисининг Умаров билан фақат бир марта кўришиш имкони бўлган, шунда ҳам ҳимоячи Санжар Умаровни қамоқхонада яланғоч кўргани ва маҳбус мулоқот қила олмайдиган аҳволда бўлганини айтган.
2005 йил апрелида ташкил этилган “Серқуёш Ўзбекистоним” коалицияси Ўзбекистон Президенти Ислом Каримовга иқтисодий ислоҳотлар ўтказиш мазмунидаги мурожаатлар билан чиққан, коалиция раҳбари Санжар Умаров Андижон воқеаларидан кейин кўпчиликка танилганди.
“Серқуёш Ўзбекистоним” коалицияси мувофиқлаштирувчиси Нодира Ҳидоятова ҳам Санжар Умаров ҳибсга олинганидан кейин Россия жамоатчилиги диққатини Ўзбекистондаги вазиятга қаратиш мақсадида Москвага бориб қайтганидан кейин ҳибсга олинган эди.
Ўта ҳафта Тошкентда Нодира Ҳидоятова устидан маҳкама бошланган, у ўзининг айбсиз экани ва шунинг учун ҳам ўзини ўзи ҳимоя қила олишини айтиб ҳимоячи хизматидан воз кечган. Нодира Ҳидоятовага ҳам яқинлари билан кўришишга изн берилмаган.
Санжар Умаров устидан кечаётган маҳкамада янги тайинланган ҳимоячиларнинг жиноят иши билан танишишлари зарурлигидан 3 февралгача танаффус эълон қилинган.
Мўътабар Тожибоевага ўн етти айблов
Фарғоналик инсон ҳуқуқлари ҳимоячиси, журналист ва норасмий “Ўтюраклар клуби”нинг раҳбари Мўътабар Тожибоева устидан ҳам маҳкама бошланган.
Маҳкамани Тошкент вилоятининг Қуйи Чирчиқ туман судида ўтказишга қарор қилинган, инсон ҳуқуқлари фаолларига ушбу жараённи кузатишга рухсат берилмаган.
Мўътабар Тожибоевага туҳмат, ҳақорат қилиш, фирибгарлик, таъмагирлик ва йирик миқдордаги маблағни ўзлаштириш каби жами ўн етти банд бўйича айб қўйилган.
Унга қўйилган асосий айблов “Ўтюраклар клуби” деб номланган нодавлат ташкилотининг молиявий фаолияти юзасидан бўлган.
Ўзбекистондаги маҳаллий кузатувчилар, Мўътабар Тожибоеванинг ҳибсга олинишига унинг мустақил журналист ва инсон ҳуқуқлари ҳимоячиси сифатидаги фаолияти сабаб бўлганини айтадилар.
У 2005 йил октябрида Дублиндаги инсон ҳуқуқлари мавзусига бағишланган халқаро конференцияга жўнашидан олдин ҳибсга олинган эди.
SOURCE: BBCUzbek
January 30th, 2006
Тошкент шаҳар маҳкамасида мухолифатдаги “Серқуёш Ўзбекистоним” коалицияси раҳбарларидан Нодира Ҳидоятова устидан дастлабки суд мажлиси ўтказилган. Маҳкамада қатнашган Нодира Ҳидоятованинг яқинлари у ўзини ғалати тутаётганига эътибор берганлар.
“Мен ўзимни ўзим ҳимоя қила оламан, шунинг учун ҳимоячи хизматига муҳтож эмасман”,-деган маҳкама бошланишида Нодира Ҳидоятова.
Маҳкамада ҳозир бўлган ва бу қарордан ҳайратланган опаси Нигора Ҳидоятова, Нодира расмийлар томонидан руҳий босимга тутилган бўлиши мумкин, деган тахминни билдирган.
“Серқуёш Ўзбекистоним” коалицияси мувофиқлаштирувчиси Нодира Ҳидоятовага коалиция раҳбари Санжар Умаров билан бирга уюшган жиноий гуруҳ ташкил этиш, хориждаги сохта ширкатлар ҳисобига йирик миқдордаги маблағ ўтказиб, ноқонуний даромад топиш, солиқ тўлашдан бўйин товлаш айблари қўйилган.
Ўзбекистон Бош прокуратураси мухолифатдаги “Серқуёш Ўзбекистоним” коалицияси раҳбарларини бир уюшган жиноий гуруҳ аъзолари, деб ҳисоблайди. Нодира Ҳидоятова беш турдаги иқтисодий жиноят содир этишда гумон этилиб ҳибсга олинганини тасдиқлаган прокурорлар.
Москвадан қайтаётган Нодира Ҳидоятова ўтган йилнинг 19 декабр тунида Тошкент аэропортида ҳибсга олинганди.
“Серқуёш Ўзбекистоним” коалицияси раҳбари Санжар Умаров эса октябр ойида йирик миқдордаги маблағни ўзлаштиришда айбланиб ҳибсга олинганди.
“Серқуёш Ўзбекистоним” коалицияси мамлакатда иқтисодий ва сиёсий ислоҳотлар ўтказишни талаб қилиб чиққан, унинг раҳбарлари Ўзбекистон расмийларини Андижондаги намойишни бостиришда айблагандилар.
Нодира Ҳидоятова Москвага сафаридан кўзлаган мақсади – “Россия жамоатчилиги эътиборини Ўзбекистондаги вазиятга қаратиш” эканини айтганди.
“Серқуёш Ўзбекистоним” коалицияси фаоллари Нодира Ҳидоятова ҳамда Санжар Умаров ҳибсга олинишининг асл сабаби мухолифатнинг сиёсий фаолиятини тўхтатиш, деб биладилар.
Санжар Умаров устидан ҳам маҳкама жараёни бошланиши кутилаётир.
Нодира Ҳидоятова иши маҳкаманинг ёпиқ эшиклари ортида давом эттирилиши мумкин.
SOURCE: BBCUzbek
January 25th, 2006
Muxolifatdagi “Serquyosh O`zbekistonim” koalitsiyasi yetakchilari Sanjar Umarov va Nodira Hidoyatova O`zbekiston jinoyat kodeksining 8 dan ortiq moddalarini buzganlikda ayblanmoqda. Muxolifat vakillari boshlanishi kutilayotgan sud jarayonining yopiq o`tishi mumkinligi haqida tashvish bildirmoqdalar.
O`zbekiston prokuraturasi tomonidan iqtisodiy jinoyatlarda ayblanayotgan Sanjar Umarovning advokati Vitaliy Krasilovskiyning ma`lum qilishicha, Sanjar Umarov ustidan tergov harakatlari 30 dekabrgacha tugatilgan va jinoiy ish Toshkent shahar sudiga oshirilgan.
“Hozircha jinoiy ish kim tomonidan ko`rilishi aniq, biroq sud boshlanish kuni ma`lum qilingancha yo`q. Ayblov xulosalari haqida oldindan biron narsa demoqchi emasman, faqat sudning xolis yondoshivuga umid qilamiz”, – deydi Vitaliy Krasilovskiy.
Muxolifatdagi koalitsiya tarkibiga kiruvchi “Ozod Dehqonlar” partiyasining raisasi, Sanjar Umarovning singlisi Nigora Hidoyatovaga ko`ra sud boshlanishining cho`zilayotganligiga sabab – Sanjar Umarov va Nodira Hidoyatovalarning o`z ayblariga iqror bo`lmayotganliklaridir.
“Aynan shuning uchun ham sud jarayonlari yopiq o`tkazilishi mumkinligidan xavotirdamiz, – deydi u.
“Qo`yilgan aybnomalardan eng og’iri 243-modda. Bu modda 15 yilgacha qamoq jazosi berilishini ko`zda tutadi. Ular nafaqat iqtisodiy jinoyatda ayblashyapti balki, unga ayblovlarni siyosiylashtirishga urinishayapti. Agar faqat iqtisodiy jinoyatlar bilan ayblanilganda, jinoiy ish liberallashtirilgan jinoiy moddalar tarkibiga kirishi mumkin edi. 243-modda esa hech qanday aministiya va jazo turlarini o`zgartirishni nazarda tutmaydi”, – deydi Nigora Hidoyatova.
Sanjar Umarov va koalitsiya muvofiqlashtiruvchisi Nodira Hidoyatovalar iqtisodiy talon-taroj qilishda ayblanib bir necha oy oldin hibsga olingan edilar. Kuzatuvchilar va koalitsiya vakillariga ko`ra bunga sabab ularning siyosiy faoliyatlari bo`lgan. Sanjar Umarov O`zbekiston hukumati iste’fosini so`rab, bayonot bilan chiqqan edi.
AQSh Kongressi esa Sanjar Umarov bo`yicha maxsus rezolyutsiya qabul qilgan. Unda muxolifat vakilining siyosiy faoliyati uchun tayziqqa uchrashi yuzasidan xavotir bildirilgan.
SOURCE: VOA
January 18th, 2006
Серқуёш Ўзбекистоним коалицияси раиси Санжар Умаров катта миқдордаги маблағни ноқонуний йўллар билан ўзлаштиришда айбланиб октябр ойида хибсга олинган эди. Унинг адвокати Виталий Красиловскийга кўра ҳозирда Умаров иши Тошкент шаҳар судига оширилган. “Лекин суд куни ҳали белгиланмаган. Судя ҳужжатлар билан танишиб бўлгач, суд кунини эълон қилса керак”, – деди Красиловский.
Айни пайтда Серқуёш Ўзбекистоним коалициясининг яна бир фаоли Нодира Ҳидоятова ҳам хибсда қолмоқда. У декабр ойида Москвадан қайтаётганида Тошкент аэропортида қамоққа олинган эди. Унга ҳам иқтисодий айбловлар қўйилмоқда. Унинг адвокатлари бу билан боғлиқ тергов материаллари билан таниша олмаганликлари борасида шикоят қилишган.
Адвокатларга кўра, бўлажак маҳкамага судя Исаев раислик қилади. Андижон воқеалари билан боғлиқ қатор ёпиқ маҳкамалар айнан мана шу судя раислигида ўтган эди. “Серқуёш Ўзбекистоним” коалицияси фаоллари устидан маҳкама ҳам ёпиқ ўтказилиши хавфи борлиги айтилмоқда.
Серқуёш коалиция таркибидаги рўйхатга олинмаган «Озод деҳқонлар” партияси бош котиби Нигора Ҳидоятова, коалиция раҳбарлари Санжар Умаров ва синглиси Нодира Ҳидоятоваларнинг ҳибсга олиниши ортида сиёсий сабабларни кўришини ва бундан асосий мақсад мухолифатнинг сиёсий фаолиятини тўхтатиш эканини айтган.
“Синглим ўғри-муттахам эмас. У курашчи ва нима учун курашаётганини яхши билади. Биз бу курашда бари бир ғолиб бўламиз”, – дейди Нигора Ҳидоятова.
“Серқуёш Ўзбекистоним” коалицияси расмий Тошкентдан иқтисодий ислоҳотларни ўтказишни талаб қилиб келади. Ҳибсга олинишидан илгари Санжар Умаров бу борада Ўзбекистон парламентига мурожаат билан чиққанди. Нодира Ҳидоятова эса қамоққа олинишидан олдин Москвага борган ва бундан кўзлаган мақсади – “Россия жамоатчилиги эътиборини Ўзбекистондаги вазиятга қаратиш” эканини айтганди.
SOURCE: Ozodlik
January 17th, 2006
O’zbekiston rasmiylariga ko’ra, Serquyosh O’zbekistonim koalitsiyasining faol a’zolaridan biri Nodira Hidoyatova Rossiyadan vataniga qaytayotib, Toshkentda qamoqqa olingan.
O’zbekiston Bosh prokuraturasining bildirishicha, Nodira Hidoyatovaga soliq to’lamaganlik va jinoiy guruhga a’zolik ayblari qo’yilmoqda.
Ayblanuvchining opasi, Nigora Hidoyatova bu ayblovlarni quruq tuhmat deb atab, singlisinig qamoqqa olinishi O’zbekiston hukumatining siyosiy muxolifatni qanchalik ta’qib qilayotganining yana bir isbotidir, dedi.
Nigora Hidoyatovaning turmush o’rtog’i, turkiyalik Orif Oydin yaqinda o’q jarohatidan vafot etgan edi. Hidoyatovaning aytishicha, umr yo’ldoshi uning siyosiy faoliyati sabab nishonga olindi.
Serquyosh O’zbekistonim koalitsiyasining rahbari Sanjar Umarov qalloblikda ayblanib, shu yilning oktyabr oyida qamoqqa olingan edi. Uning taqdiri noma’lumligicha qolmoqda.
SOURCE: Voice of America
December 21st, 2005
Ўзбекистон Бош прокуратураси мухолифатдаги “Серқуёш Ўзбекистоним” коалицияси раҳбарларини бир уюшган жиноий гуруҳ аъзолари, деб ҳисоблайди. Нодира Ҳидоятова беш турдаги иқтисодий жиноят содир этишда гумон этилиб ҳибсга олинганини тасдиқлаган прокурорлар.
Москвадан қайтаётган Нодира Ҳидоятова 19 декабр тунида Тошкент аэропортида ҳибсга олинганди.
Ўзбекистон Бош прокуратураси мухолифат фаоли устидан жиноий иш қўзғатилганини маълум қилган. Бош прокуратурага кўра, Нодира Ҳидоятова Санжар Умаров билан уюшган жиноий гуруҳ тузганлар, хориждаги сохта ширкатлар ҳисобига йирик миқдордаги маблағ ўтказиб, ноқонуний даромад топганлар, солиқ тўлашдан бўйин товлаганлар.
Октябр ойида “Серқуёш Ўзбекистоним” коалицияси раҳбари Санжар Умаров йирик миқдордаги маблағни ўзлаштиришда айбланиб ҳибсга олинганди.
Шу йил апрелида ташкил этилган “Серқуёш Ўзбекистоним” коалицияси мамлакатда иқтисодий ва сиёсий ислоҳотлар ўтказишни талаб қилиб келади, ҳибсга олинишидан илгари Санжар Умаров Ўзбекистон парламентига мурожаат билан чиққанди.
Нодира Ҳидоятова бир ойча илгари Москвага борган, бундан кўзлаган мақсади – “Россия жамоатчилиги эътиборини Ўзбекистондаги вазиятга қаратиш” эканини айтганди.
“Серқуёш Ўзбекистоним” коалициясига кирган “Озод деҳқонлар” партияси бош котибаси Нигора Ҳидоятова, коалиция раҳбарлари ҳибсга олинишининг асл сабабини мухолифатнинг сиёсий фаолиятини тўхтатиш, деб билади.
SOURCE: BBC
December 20th, 2005
Ўзбекистон Бош прокуратураси мухолифатдаги “Серқуёш Ўзбекистоним” коалицияси раҳбарларини ягона уюшган жиноий гуруҳ аъзолари, деб ҳисоблашини маълум қилди.
Прокурорларга кўра Нодира Ҳидоятова беш турдаги иқтисодий жиноят содир этишда гумон этилиб ҳибсга олинган.
Ўзбекистон прокуратураси матбуот котиби Светлана Ортиқова гапиради;
“Бу иқтисодий жиноятлардир. Бунга сиëсий тус беришга хожат йўқ. Ҳидоятова иқтисодий жиноятларни содир этганликда гумон қилинмоқда.”
Бош прокуратурага кўра, Нодира Ҳидоятова Санжар Умаров билан уюшган жиноий гуруҳ тузиб, хориждаги сохта ширкатлар ҳисобига йирик миқдордаги маблағ ўтказиб, ноқонуний даромад топганлар, солиқ тўлашдан бўйин товлаган.
Октябр ойида “Серқуёш Ўзбекистоним” коалицияси раҳбари Санжар Умаров йирик миқдордаги маблағни ўзлаштиришда айбланиб ҳибсга олинган эди.
Шу йил апрелида ташкил этилган “Серқуёш Ўзбекистоним” коалицияси мамлакатда мўътадил иқтисодий ва сиёсий ислоҳотлар ўтказишни талаб қилиб Ўзбекистон парламентига мурожаат билан чиққан эди.
Эслатиб ўтамиз. Москвадан қайтаётган Нодира Ҳидоятова 19 декабр тунида Тошкент аэропортида ҳибсга олинган эди.
SOURCE: Ozodlik
December 20th, 2005
Бир ҳафта оворагарчиликдан сўнг, 28 ноябрь куни Санжар Умаровнинг адвокатлари у билан учрашишга муваффақ бўлди. “Серқуёш Ўзбекистоним” коалицияси раҳбари уларга ўз соғлиғидан шикоят қилди.
Бу ҳақда унинг адвокати Виталий Красиловский маълум қилди.
“С.Умаров ўз соғлиғини текшириб кўришларини илтимос қилди. Қон босими борлиги, юрагининг мазаси йўқлигини айтди. Бу ҳақда бир неча марта ҳибсхона маъмуриятига мурожаат қилгани, лекин илтимослари инобатга олинмаганини билдирди”, – деди адвокат.
В.Красиловскийнинг сўзларига кўра, С.Умаровнинг ташқи кўриниши яхши, бўлса-да, соғлиғидан шикоят қилмоқда.
Ўзбекистон Бош прокуратураси матбуот хизмат раҳбари Светлана Ортиқова ҳам “Озодлик” мухбири билан суҳбатда С.Умаровга тазйиқ ўтказилмаётгани, унинг соғлиғи жойида эканини билдирди.
Бундан аввалроқ эса “Санжар Умаровни озод қилиш қўмитаси” унинг аҳволи тобора ёмонлашиб бораётгани ҳақида хабар тарқатган эди.
Қўмита аъзоси Баҳодир Намозовнинг “Озодлик” мухбирига айтишича, С.Умаров ишида анча тушунмовчиликлар бор. Жумладан, адвокатлар шу пайтгача нафақат С.Умаров билан, балки унинг терговчилари билан ҳам учраша олмай келмоқда.
“Агар унинг жиноят иши чиндан ҳам иқтисодий характерда бўлса, нега бу шунчалик сирли равишда кўрилаётгани, нега тўсиқлар юзага келаётгани ҳақида савол пайдо бўлади”, – деди Б.Намозов.
Унинг таъкидлашича, айни пайтда С.Умаров саломатлиги ёмонлашаётгани жиддий ташвиш уйғотмоқда. Унинг иши билан шуғулланаётган терговчиларнинг руҳий ва жисмоний тазйиқлари С.Умаров соғлиғига салбий таъсир кўрсатяпти.
Қўмита Санжар Умаровнинг дарҳол қамоқдан озод қилинишини ҳамда саломатлигини текшириш учун мустақил халқаро тиббий комиссия киритилишини талаб қиляпти.
Б.Намозов қўмита бундан кейин “Виждон тутқунларини озод қилиш қўмитаси” номи билан юритилишини билдирди. Чунки, унинг эътирофича, ҳозир Ўзбекистонда сохта айблар билан ўнлаб мухолифат вакиллари ва инсон ҳуқуқи ҳимоячилари қамоққа ташланган.
Б.Намозов айни кунларда ҳибсда сақланаётган Мўътабар Тожибоева, Норбой Холжигитов, Ҳамдам Сулаймонов ва Саиджаҳон Зайнобиддиновни мисол қилиб келтирар экан, уларни озод қилиш учун барча кучларни мувофиқлаштиришга қўмита номидан даъват этди.
SOURCE: RFE/RL-Ozodlik
November 28th, 2005
Previous Posts